ნორვეგიულმა კომპანია Equinor-მა (ყოფილი Statoil) უკრაინაში მიმდინარე სამხედრო ვითარების გამო რუსული პროექტებიდან, მათ შორის "როსნეფტთან" პარტნიორობის ჩათვლით, გამოსვლის დაწყების შესახებ განაცხადა. კომპანიამ ხაზი გაუსვა თანამშრომლების უსაფრთხოების პრიორიტეტს.

ნორვეგიული ნავთობისა და გაზის კომპანია Equinor-ის (ყოფილი Statoil) დირექტორთა საბჭომ მიიღო გადაწყვეტილება რუსეთში ერთობლივი საწარმოებიდან გასვლისა და ქვეყანაში ახალი ინვესტიციების შეჩერების შესახებ. ამის შესახებ ნათქვამია კომპანიის მიერ გავრცელებულ განცხადებაში.

„ჩვენ ყველანი ღრმად ვართ შეშფოთებული უკრაინაში შეჭრით, რომელიც წარმოადგენს საშინელ უკუსვლას მთელი მსოფლიოსთვის და ჩვენ ვფიქრობთ ყველა იმათთაგანზე, ვინც საომარი მოქმედებების გამო იტანჯება“, - განაცხადა Equinor-ის პრეზიდენტმა და აღმასრულებელმა დირექტორმა ანდერს ოპედალმა. მან ხაზგასმით აღნიშნა, რომ Equinor-ის მთავარი პრიორიტეტი ამ რთულ ვითარებაში არის "ჩვენი ხალხის უსაფრთხოება".

„ჩვენ ველით, რომ გადაწყვეტილება რუსეთში ერთობლივი საწარმოებიდან გასვლის პროცესის დაწყების შესახებ იმოქმედებს Equinor-ის რუსული აქტივების საბალანსო ღირებულებაზე და გამოიწვევს მათ გაუფასურებას“, - ნათქვამია კომპანიის განცხადებაში.

ცნობისათვის, Equinor რუსეთში 30 წელზე მეტია მუშაობს.