ნავთობპროდუქტების იმპორტიორთა კავშირის განცხადებით,

,,თებერვლის თვეში ნავთობის ფასი მაქსიმუმ მაჩვენებლებს ინარჩუნებდა გასული წლის სექტემბრის თვის შემდეგ. ამასთან აღსანიშნავია, რომ ნავთობის ფასი მხოლოდ 2 დღეა მცირდება. კერძოდ, ამ  2 დღის განმავლობაში  ლონდონში  ნავთობის ფასი შემცირდა 2.99 დოლარით 113.53 დოლარამდე ბარელზე, ხოლო ნიუ-იორკში 3.82 დოლარით  92.84 -მდე ბარელზე.

ნავთობის ფასის შემცირების ძირითადი მიზეზი გახლავთ ის, რომ გაჩნდა ინფორმაცია იმასთან დაკავშირებით, რომ საუდის არაბეთი აპირებს ნავთობის მოპოვების გაზრდას, რათა დააკმაყოფილოს ნავთობზე გაზრდილი მოთხოვნილება ისეთი ქვეყნებისა, როგორიცაა მაგალითად ჩინეთი. გარდა ამისა, მიმდინარე კვირაში გაზრდილია აშშ-ში ნავთობის კომერციული მარაგები. ნავთობის ფასის შემცირება დროებითია, თუ ტენდენციის ხასიათი ექნება, ეს უახლოეს პერიოდში გამოჩნდება.

ნავთობის ფასის ზრდის შესაბამისად, გაზრდილია ასევე საერთაშორისო ფასები ნავთობპროდუქტებზე Platt’s-ის (რომელზეცაა დამოკიდებული საქართველოში საწვავის ფასი) მიხედვით. წლის დასაწყისიდან 21 თებერვლის მდგომარეობით ბენზინის ფასი გაზრდილია 995 დოლარიდან 1104  დოლარამდე ტონაზე, ხოლო დიზელის საწვავის  (10PPM) ფასი -  953 დოლარიდან 990 დოლარამდე ტონაზე.

ფაქტიურად საქართველოში სექტემბრის თვის შემდეგ საცალო ქსელში ფასები მხოლოდ მცირდებოდა. თუმცა ბოლო დღეებში მოხდა საწვავის ფასის ზრდა სხვადასხვა კატეგორიების მიხედვით საშუალოდ 2-5 თეთრის ოდენობით ლიტრაზე. ფასის ზრდა საქართველოში  დაკავშირებულია სანავთობო ბაზარზე არსებულ იმ ვითარებასთან, რომელზეც ზემოთ მოგახსენეთ.