ნავთობპროდუქტების იმპორტიორთა კავშირის განცხადებით:

„მიმდინარე წლის მარტის თვეში საქართველოში ნავთობპროდუქტების (ბენზინი და დიზელის საწვავი)  იმპორტმა შეადგინა 65.1 ათასი ტონა. მათ შორის, ბენზინის საწვავის იმპორტმა შეადგინა 28.9 ათასი ტონა და დიზელის საწვავის იმპორტმა - 36.2 ათასი ტონა. გასული წლის ანალოგიური პერიოდის მაჩვენებელთან შედარებით ნავთობპროდუქტების (ბენზინი და დიზელის საწვავი) იმპორტი მნიშვნელოვნადაა გაზრდილი (12.2 ათასი ტონით).

2013 წლის I კვარტალში საქართველოში ნავთობპროდუქტების (ბენზინი და დიზელის საწვავი)  იმპორტმა შეადგინა 154.2 ათასი ტონა. მათ შორის, ბენზინის იმპორტმა  შეადგინა 75.9 ათასი ტონა და დიზელის საწვავის იმპორტმა - 78.2 ათასი ტონა.

ქვეყნების მიხედვით, მ/წელს ბენზინის იმპორტის ყველაზე დიდი მოცულობა განხორციელდა რუმინეთიდან (41.9 ათასი ტონა), შემდეგ მოდიან ბულგარეთი  (23.7 ათასი ტონა), აზერბაიჯანი (5.0  ათასი ტონა), იტალია (4.3 ათასი ტონა) და სხვ.

რაც შეეხება დიზელის საწვავს, მ/წლის I კვარტალში იმპორტის ყველაზე დიდი მოცულობა განხორციელდა აზერბაიჯანიდან (35.7 ათასი ტონა), შემდეგ მოდიან რუმინეთი  (16.6 ათასი ტონა), რუსეთი (14.6  ათასი ტონა), ბულგარეთი (7.5 ათასი ტონა), საბერძნეთი (3.8 ათასი ტონა).

გაზაფხულის დადგომასთან ერთად ნავთობპროდუქტების მოხმარება ტრადიციულად იზრდება იქიდან გამომდინარე, რომ ამ პერიოდში აქტიურდება სასოფლო-სამეურნეო სამუშაოები, ინფრასტრუქტურული პროექტები, მშენებლობები, სატრანზიტო გადაზიდვები. ზოგადად ეკონომიკური ვითარება უმჯობესდება. შესაბამისად, ნავთობპროდუქტების იმპორტისა და მოხმარების ზრდა, დღევანდელი ეკონომიკური ვითარების გაუმჯობესების ერთ-ერთი მნიშვნელოვანი ფაქტორია.