ნავთობპროდუქტების იმპორტიორთა კავშირის თავმჯდომარე ვანო მთვრალაშვილის განცხადებით,

საქართველოში ამოქმედდა ფინანსთა მინისტრის ბრძანება №188 "საქართველოს საბაჟო ტერიტორიაზე საქონლის გადაადგილებისა და გაფორმების შესახებ ინსტრუქციის დამტკიცების თაობაზე" საქართველოს ფინანსთა მინისტრის 2012 წლის 26 ივლისის №290 ბრძანებაში ცვლილებების შეტანის თაობაზე, რომლის პირველი მუხლის მე-3 პუნქტის მიხედვით სავალდებულო ხდება იმპორტირებული ნავთობის ბიტუმის განბაჟების დროს მისი ლაბორატორიული კვლევა. აღნიშნული ბრძანება დროულია და ხელს შეუწყობს ბაზარზე უხარისხო ნავთობის ბიტუმის შემოტანის შეზღუდვას, რაც დადებითად იმოქმედებს როგორც დაგებული ასფალტის ხარისხზე, ასევე ბაზარზე კომპანიებს შორის ჯანსაღი კონკურენციის განვითარებაზე.  

საქართველოში ნავთობის ბიტუმის ერთ-ერთი დიდი მომწოდებელია ირანის ისლამური რესპუბლიკა, საიდანაც ძირითადში პროდუქციის ტრანსპორტირება ხდება საავტომობილო სატვირთო ცისტერნებით.  ჩვენი საზღვრის გადმოკვეთის შემდეგ 48 საათის შემდეგ ყოველ დღეზე დაწესებულია მოცდენის თანხა დაახლოებით 120 დოლარის ოდენობით თითოეულ სატრანსპორტო საშუალებაზე.

"აკრედიტაციის ერთიანი ეროვნული ორგანო - აკრედიტაციის ცენტრის" ინფორმაციით, დღევანდელი მდგომარეობით არ არის აკრედიტირებული არც ერთი საგამოცდო ლაბორატორია, რომელიც შეძლებს ნავთობის ბიტუმზე გამოცდის ჩატარებას.

რჩება მხოლოდ ერთი - "ლევან სამხარაულის სახელობის სასამართლო ექსპერტიზის ეროვნული ბიურო", რომელსაც ჩვენი კანონმდებლობით მინიჭებული აქვს ნავთობის ბიტუმზე ლაბორატორიული კვლევის ჩატარების უფლება. აღნიშნულ ლაბორატორიაში ნავთობის ბიტუმის ლაბორატორიული კვლევა ხორციელდება 30 დღის განმავლობაში, ხოლო დაჩქარებული წესით -  5 სამუშაო დღის ვადაში. თუმცა ხშირი იქნება შემთხვევები, როდესაც მოხვდება არასამუშაო დღეები (შაბათი, კვირა, სადღესასწაულო დღეები), რის გამოც მეწარმეს ხშირ შემთხვევაში მოუწევს ლაბორატიული დასკვნის ლოდინი უფრო მეტ ხანს. აქედან გამომდინარე მეწარმეს მოუწევს სოლიდური თანხის გადახდა მოცდენის სახით. ასევე შესაძლებელია დაირღვეს ასფალტის მწარმოებლისათვის პროდუქციის მისაწოდებელი გრაფიკიც. ყველაფერმა ამან  კი  თავის მხრივ შესაძლოა მეწარმეს სხვა ფინანსური პრობლემებიც (თუნდაც მძღოლის დაბინავების და კვების ხარჯები) წარმოუშვას.

ნავთობის ბიტუმის იმპორტიორი კომპანიების თხოვნაა ლევან სამხარაულის სახელობის სასამართლო ექსპერტიზის ეროვნული ბიუროსადმი, რომ ზემოხსენებულის გათვალისწინებით მოხდეს დაჩქარებული წესით (რომელიც ამჟამად წარმოადგენს 5 სამუშაო დღეს) ლაბორატორიული კვლევის დროის შემცირება.