ნავთობპროდუქტების იმპორტიორთა კავშირის განცხადებით:

„ბოლო წლების განმავლობაში ნავთობპროდუქტების იმპორტის დინამიკა მისი სახეობების მიხედვით (ბენზინი, დიზელის საწვავი) განსხვავებულია.

კერძოდ, თუ დიზელის საწვავის იმპორტი ბოლო 4 წლის განმავლობაში იზრდება (2010 წ.  -  399,9 ათასი ტონა, 2011 წ. - 428,6 ათასი ტონა, 2012 წ. - 459,9 ათასი ტონა, 2013 წლის პირველი ათი თვე  - 371,3 ათასი ტონა), ბენზინის იმპორტი  პირიქით, მცირდება (2010 წ. - 409,1 ათასი ტონა, 2011 წ. - 402,5  ათასი ტონა, 2012 წ. - 382,4  ათასი ტონა, 2013 წლის პირველი ათი თვე  - 297,3  ათასი ტონა).

აქვე უნდა აღინიშნოს, რომ საქართველოში ბოლო წლების განმავლობაში საავტომობილო პარკი მნიშვნელოვნადაა გაზრდილი.  საქართველოს შინაგან საქმეთა სამინისტროს მიერ ოფიციალურად გამოქვეყნებული სტატისტიკურ-ანალიტიკური კვლევის თანახმად ბოლო წლების განმავლობაში საქართველოში რეგისტრირებულ ავტოსატრანსპორტო საშუალებათა რაოდენობის ზრდის დინამიკა შემდეგი სახისაა:  2007 წ. - 517574 ერთეული, 2008 წ. - 603380 ერთეული (ზრდა + 16,5%),   2009 წ. - 647209  ერთეული (+ 7,2%), 2010 წ. - 693873 ერთეული (+ 7,2%), 2011 წ. - 745232 ერთეული (+ 7,4%),  2012 წ. - 806323 ერთეული (+ 8,2%).

ბენზინის იმპორტის და შესაბამისად, მოხმარების შემცირება პირდაპირ უკავშირდება ავტოგაზის მოხმარებაზე გადასვლას, რომელიც მზარდი მოთხოვნილებით ხასიათდება  მისი  ბენზინთან შედარებით დაბალი ფასის გამო და აღნიშნულ ტენდენციას მომავალშიც შეინარჩუნებს. თანაც მნიშვნელოვანია, რომ ავტოგაზგასამართი სადგურების ქსელი დღითიდღე ფართოვდება და უკვე თითქმის მთელი ქვეყანას მოიცავს, რაც მომხმარებელს უფრო მეტი კომფორტის საშუალებას აძლევს ავტოგაზის გამოყენების მხრივ. ადრე გაზის მომხმარებელი თუ მხოლოდ ტაქსები იყვნენ, დღეისათვის მათ რიცხვს ყველა სოციალური ფენის მომხმარებელი დაემატა. მაღალი კუბადურობის მქონე ავტოსატრანსპორტო საშუალებებთან ერთად ავტოგაზის მოხმარებაზე აქტიურად გადადიან ასევე დაბალი კუბადურობის მოცულობის სატრანსპორტო საშუალებებიც, რომლებიც გამოირჩევიან საწვავის ეკონომიური წვით".