ნავთობპროდუქტების იმპორტიორთა კავშირის განცხადებით:

2018 წლის მაისის თვეში  საქართველოში საავიაციო ნავთის იმპორტმა შეადგინა 7,3 ათასი ტონა, რაც 1,5 ათასი ტონით ნაკლებია აპრილის თვის მაჩვენებელთან შედარებით (8,8 ათასი ტონა).

ქვეყნების მიხედვით, 2018 წლის მაისში საავიაციო ნავთის იმპორტის ყველაზე დიდი მოცულობა განხორციელდა თურქმენეთიდან - 4,9 ათასი ტონა, რაც მთელი იმპორტის 67,1%-ს შეადგენს. შემდეგ მოდიან: საბერძნეთი - 1,9 ათასი ტონა (26,0%), რუმინეთი - 0,5 ათასი ტონა (6,8%).

მიმდინარე წლის იანვარ-მაისის თვეების განმავლობაში საავიაციო ნავთის იმპორტმა შეადგინა 31,3 ათასი ტონა, რაც 3,3 ათასი ტონით ანუ 11,8%-ით აღემატება გასული წლის ანალოგიური პერიოდის მაჩვენებელს (28,0 ათასი ტონა).

2018 წლის მაისის თვეში  საქართველოში სანავთობო ბიტუმის იმპორტმა შეადგინა 7,7 ათასი ტონა, რაც 2,1 ათასი ტონით აღემატება აპრილის თვის მაჩვენებელს (5,8 ათასი ტონა). აქედან იმპორტის 97,4% მოდის  ირანის ისლამურ რესპუბლიკაზე.

მიმდინარე წლის იანვარ-მაისის თვეების განმავლობაში სანავთობო ბიტუმის იმპორტმა შეადგინა 22,4 ათასი ტონა, რაც 4,1 ათასი ტონით ანუ 15,5%-ით ნაკლებია გასული წლის ანალოგიური პერიოდის მაჩვენებელთან შედარებით (26,5 ათასი ტონა).

სანავთობო ბიტუმის მოხმარება ძირითადად ხდება გზების მშენებლობისას, ასფალტის წარმოებისას. ჩვენი აზრით, მომავალ თვეებში აღნიშნული სამუშაოების მასშტაბურად გააქტიურების შედეგად პროდუქციის მოხმარება კიდევ მეტად გაიზრდება.

2018 წლის მაისის თვეში  საქართველოში გათხევადებული აირების  პროპან-ბუტანის ნაერთის (LPG) იმპორტმა შეადგინა 1,1 ათასი ტონა, რაც 0,5 ათასი ტონით აღემატება აპრილის თვის მაჩვენებელს (1,6 ათასი ტონა).

მიმდინარე წლის იანვარ-მაისის  თვეებში  გათხევადებული აირების  პროპან-ბუტანის ნაერთის (LPG) იმპორტმა შეადგინა 4,8 ათასი ტონა, რაც ფაქტიურად ანალოგიურია გასული წლის 5 თვის მაჩვენებლისა.

LPG  მოიხმარება საყოფაცხოვრებო და სამრეწველო დანიშნულებით,  ბოლო პერიოდში ის მოიხმარება ასევე საავტომობილო საწვავის სახით. დღევანდელი მონაცემებით საქართველოში საშუალოდ 2500-3000 ავტომობილი მოიხმარს LPG-ის საწვავად.

07.05.2018