ნავთობპროდუქტების იმპორტიორთა კავშირის განცხადებით:

„მიმდინარე წლის პირველი ორი თვის განმავლობაში საქართველოში ნავთობპროდუქტების (ბენზინი და დიზელის საწვავი)  იმპორტმა შეადგინა 89,1 ათასი ტონა, რაც 20,3 ათასი ტონით ნაკლებია 2012 წლის ანალოგიური პერიოდის მაჩვენებელთან შედარებით და 18 ათასი ტონით აღემატება 2011 წლის ანალოგიურ მაჩვენებელს.

კერძოდ, 2013 წლის იანვარ-თებერვლის თვეებში იმპორტირებულ იქნა 47,1 ათასი ტონა ბენზინი და 42  ათასი ტონა დიზელის საწვავი.

საწვავის კატეგორიების მიხედვით, 2013 წლის პირველი ორი თვის განმავლობაში რეგულარის ტიპის ბენზინის საწვავის იმპორტმა შეადგინა  მთელი ბენზინის იმპორტის 72 %, პრემიუმმა - 22,5%, სუპერმა - 5,5 %. რაც შეეხება დიზელის საწვავს, L-62 ტიპის დიზელის საწვავის იმპორტმა შეადგინა მთელი დიზელის საწვავის იმპორტის დაახლოებით 54%, ხოლო ევრო დიზელმა - 46%.

ზოგადად უნდა ითქვას, რომ მიმდინარე წელს საწვავის იმპორტი მართალია გასული წლის ანალოგიური პერიოდის მაჩვენებელთან შედარებით შემცირებულია,  მაგრამ მაინც მაღალ ნიშნულზე დგას, თუ იმ ფაქტსაც გავითვალისწინებთ, რომ საქართველოში დღითი დღე მატულობს  ავტოგაზის მოხმარება, რომლის ფასიც მნიშვნელოვნად დაბალია (1,05 ლარი/კუბამეტრზე) ბენზინის ფასთან შედარებით და მნიშვნელოვან კონკურენციას უწევს მას ფასიდან გამომდინარე.

აქვე უნდა აღინიშნოს, რომ გაზაფხულიდან იწყება საწვავის მოხმარების უფრო აქტიური პერიოდი, რაც თავის მხრივ დაკავშირებულია სასოფლო-სამეურნეო სამუშაოების, მშენებლობების, ინფრასტრუქტურული პროექტების გააქტიურებასთან. შესაბამისად, ჩვენ ველოდებით, რომ მომდევნო თვეებში საწვავის იმპორტი გაიზრდება, რაც თავისთავად უზრუნველყოფს სახელმწიფო ბიუჯეტში თანხების მაღალ შენატანებს.