ნავთობპროდუქტების იმპორტიორთა კავშირის განცხადებით,

,,ბოლო პერიოდის განმავლობაში ნავთობის ფასი მცირდება.  ფასების კლება დაიწყო მ/წლის 14 თებერვლიდან და დღემდე გრძელდება. კერძოდ, ბოლო 1 თვის განმავლობაში ნავთობის ფასი შემცირებულია  ლონდონში  დაახლოებით 10  დოლარით 108.52 დოლარამდე/ბარელზე, ხოლო ნიუ-იორკში 5 დოლარით  92.52 დოლარამდე/ბარელზე.

თუმცა აქვე უნდა აღვნიშნოთ, რომ წინა პერიოდი, კერძოდ წლის დასაწყისიდან თებერვლის შუა რიცხვებამდე ხასიათდებოდა საპირისპირო ტენდენციით -  ნავთობის ფასი მხოლოდ მატულობდა.

ნავთობის ფასის კლების შესაბამისად, შემცირებულია ასევე საერთაშორისო ფასები ნავთობპროდუქტებზე Platt's-ის (რომელზეცაა დამოკიდებული საქართველოში საწვავის ფასი) მიხედვით. მ/წლის 13 მარტის მდგომარეობით ბენზინის ფასი შეადგენს 973 დოლარს/ტონაზე, ხოლო დიზელის საწვავის  (10PPM) ფასი -  930 დოლარს/ტონაზე.

აქვე უნდა აღვნიშნოთ, რომ იანვრის ბოლო რიცხვებიდან მთელი თებერვლის თვე Platt's-ის ფასი საკმაოდ მაღალ ნიშნულზე იყო. კერძოდ, ბენზინის ფასი მერყეობდა 1090-1130 დოლარის ფარგლებში/ტონაზე. მარტის თვეში მხოლოდ რამოდენიმე დღეა (4 სავაჭრო დღე), რაც ბენზინის საერთაშორისო ფასი 1000 დოლარს ქვევითაა დაკლებული. შესაბამისად, საწვავის ფასის კორექტირება დამოკიდებული იქნება საერთაშორისო ბაზარზე არსებული მიმდინარე ვითარების შენარჩუნებასთან და მაღალ ფასად შეძენილი პროდუქტის შედარებით დაბალფასიანით ჩანაცვლების პერიოდთან.