ნავთობპროდუქტების იმპორტიორთა კავშირის განცხადებით: „ამ დღეებში გავრცელდა ინფორმაცია, რომ კომპანია სოკარი აღარ შემოიტანდა  ბაქოს ქარხნებიდან პროდუქციას. ამასთან დაკავშირებით გვინდა აღვნიშნოთ, რომ წელიწადის ამ დროს, კერძოდ იანვრის თვეში ბაქოს გადამამუშავებელი ქარხნები ყოველთვის ახორციელებენ გადაიარაღების პროცესებს. ეს ჩვენთვის ახალი არ არის. მარტის თვემდე მათ ყოველთვის აქვთ პროდუქციის ნაკლებობა, ამიტომ გადამამუშავებელი ქარხნები ცდილობენ პროდუქციის ის რაოდენობა გამოუშვან, რომელიც აკმაყოფილებს შიდა ბაზრის მოთხოვნილებებს.

ბუნებრივია, ასეთ დროს კომპანია სოკარი პროდუქტს ევროპაში ყიდულობს,  კერძოდ, რუმინეთის ქარხნებში, რომელიც მთლიანად პასუხობს საქართველოში მოქმედ სტანდარტებს. თუმცა, აქვე უნდა აღინიშნოს, რომ დღეისათვის საქართველოს ბაზარი  აზერბაიჯანიდან სხვადასხვა ნავთობპროდუქტით მარაგდება. კერძოდ, დიზელის საწვავით, საგზაო ბიტუმით, საცხებ-საპოხი მასალებით,  ასევე ბუნებრივი აირით.

აქვე გვინდა აღვნიშნოთ, რომ კომპანია სოკარი  აქტიურად ვითარდება ევროპის კონტინენტზე. კერძოდ, ის ავითარებს ავტოგასამართი სადგურების ქსელს ბულგარეთში, შვეიცარიაში, ესპანეთში, უკრაინაში...

ცნობისათვის, ევროპული საწვავი, რომელსაც ყიდულობს კომპანია სოკარი რუმინეთიდან წარმოადგენს ევრო 4, ევრო 5 ტიპის საწვავს".