ნავთობპროდუქტების იმპორტიორთა კავშირის განცხადებით:

2017 წლის იანვარ-ოქტომბრის  თვეებში  საქართველოში საავიაციო ნავთის იმპორტმა შეადგინა 78,1 ათასი ტონა, რაც 17.3 ათასი ტონით ანუ 28,4 %-ით აღემატება გასული წლის ანალოგიური პერიოდის მაჩვენებელს (60,8 ათასი ტონა), ხოლო 26 ათასი ტონით ანუ 49,9%-ით  მეტია 2015 წლის ანალოგიური პერიოდის მაჩვენებელთან (52,1 ათასი ტონა) შედარებით .

ქვეყნების მიხედვით, 2017 წლის პირველი 10 თვის განმავლობაში საავიაციო ნავთის იმპორტის ყველაზე დიდი მოცულობა განხორციელდა თურქმენეთიდან - 36,1 ათასი ტონა, რაც მთელი იმპორტის 46,2%-ს შეადგენს. შემდეგ მოდიან: აზერბაიჯანი - 24,5 ათასი ტონა (31,4%), საბერძნეთი - 16,2 ათასი ტონა (20,7%), თურქეთი - 0,8 ათასი ტონა (1,0%), იტალია 0,5 ათასი ტონა (0,6%).

ბოლო წლების განმავლობაში საავიაციო ნავთის იმპორტი და მოხმარება მნიშვნელოვნად იზრდება, რაც დაკავშირებულია საქართველოში საერთაშორისო რეისების განმახორციელებელი საჰაერო სატრანსპორტო საშუალებების რეისების ზრდასთან, რომელიც  თავისთავად უკავშირდება  საქართველოში ვიზიტორებისა და ტურისტების  მატებას.