უკანასკნელი რამოდენიმე დღის მანძილზე მედია საშუალებების მეშვეობით ტელესივრცეში აქტიურად შუქდება შპს ”შავი ზღვის ტერმინალის” თანამშრომელთა ერთი ჯგუფის მიერ გამართული აქცია. ჩვენ პატივს ვცემთ ყველა მედია საშუალებას, რომელიც მონაწილეობდა ამ პროცესების გაშუქებაში, მაგრამ ვიტოვებთ უფლებას გთხოვოთ ნებისმიერი საკითხი თუ პრობლემა არ იქნეს გაშუქებული მხოლოდ ცალმხრივად და საზოგადოებას მიეწოდოს დაბალანსებული ინფორმაცია. ზუსტად ამ მიზნით გადავწყვიტეთ მოგმართოთ საჯარო წერილით.

შპს ”შავი ზღვის ტერმინალი” თითქმის 5 წელის ექსპლუატაციაშია და ფუნქციონირებს. აქ წლების განმავლობაში ერთმანეთის გვერდიგვერდ მუშაობენ აზერბაიჯანისა და საქართველოს მოქალაქეები, რომლებიც ერთმანეთის მიმართ განწყობილნი არიან ურთიერთპატივისცემითა და თანადგომის სურვილით.

კომპანიამ მშენებლობის პერიოდში დასაქმებული ჰყავდა 2000-მდე საქართველოს მოქალაქე, ხოლო ექსპლუატაციაში შესვლის შემდგომ დღეის მდგომარეობით დასაქმებულია 600-ზე მეტი პირი, მათგან მხოლოდ უმნიშვნელო წილი, დასაქმებულთა დაახლოებით 5 პროცენტი არის უცხოელი.

განვლილი წლების მანძილზე ძალიან ბევრი რამ გაკეთდა კომპანიის მენეჯმენტის მხრიდან თანამშრომელთა სოციალური და სამუშაო პირობების გასაუმჯობესებლად. შრომის ანაზღაურებაზე დამატებით კომპანია საკუთარი ხარჯებით უზრუნველყოფს ყველა თანამშრომლის სამედიცინო დაზღვევას საოჯახო პაკეტით, რომლის სამომხმარებლო პროდუქტის მოცულობა ყოველწლიურად უმჯობესდება და სამედიცინო მომსახურეობის გარდა მოიცავს მედიკამენტების ღირებულების 80-90 %-ით ანაზღაურებას. ასევე თანამშრომლები სარგებლობენ უფასო სადილით, კომპანიის კუთვნილი ტრანსპორტით გადაადგილების უფლებით ხობისა და ფოთის მიმართულებით, თითოეული მათგანი უზრუნველყოფილია სპეციალური სამუშაო ტანსაცმლით. სამუშაო ადგილებზე შექმნილია შრომის უსაფრთხოების საერთაშორისო სტანდარტების შესაბამისი სამუშაო პირობები. პერიოდულად ხორციელდება თანამშრომელთა კვალიფიკაციის ამაღლება საერთაშორისო ბაზარზე ავტორიტეტული კომპანიებიდან მოწვეული ტრეინერების დახმარებით. ყოველივე ჩამოთვლილი კი არის ის, რისი გაკეთებაც შევძელით ჩვენი მუშაობის მოკლე პერიოდში. ვფიქრობთ, რომ ეს არცთუ ცოტაა.

რაც შეეხება შრომის ანაზღაურებასთან დაკავშირებულ საკითხებს, თანაშრომელთა ანაზღაურების ოდენობა განისაზღვრება კვალიფიკაციისა და შესასრულებელი სამუშაოს ხარისხის შესაბამისად. ამავდროულად ყოველწლიურად ხდება თანამშრომელთა სამუშაოს შესრულებისა და კვალიფიკაციის ამაღლების დონის შეფასება და შედეგების შესაბამისად ფორმირდება სახელფასო განაკვეთების ზრდის მოცულობა და რა თქმა უნდა, ეს იღებს თანამდებობრივი დიფერენცირების სახეს.

ჩვენი კომპანიის სურვილი იყო და არის ურთიერთპატივისცემაზე აგებული ურთიერთობები ადგილობრივ მოსახლეობასთან. რეგიონში არსებული შრომითი რესურსების დასაქმების პრობლემას მხოლოდ ჩვენი კომპანია ვერ გადაწყვეტს, მაგრამ ჩვენ აქტიურად ვიღებთ მონაწილეობას ამ პრობლემის ნაწილობრივ მოგვარების პროცესში. ჩვენი კომპანიის ფუნქციების სპეციფიკურობის გათვალისწინებით შესასრულებელი სამუშაოების ძალიან დიდი წილი მოითხოვს კვალიფიციურ შრომით რესურსს. ვცდილობთ ადგილობრივი შრომითი რესურსის ის ნაწილი დავასაქმოთ, რომელიც შესაბამისი ტრეინინგების გავლის შემდეგ შეძლებს ჩაებას კომპანიის შრომით საქმიანობაში და ეფექტურად შეასრულოს მასზე დაკისრებული მოვალეობები.

კიდევ ერთხელ ვადასტურებთ ჩვენს ღრმა პატივისცემას განსხვავებული აზრის მიმართ და გვსურს ყველა მედიასაშუალებას გისურვოთ წარმატებები.

შპს ”შავი ზღვის ტერმინალის” მენეჯმენტი”