ნავთობპროდუქტების იმპორტიორთა კავშირის განცხადებით:

„2012 წლის განმავლობაში საქართველოში საწვავის იმპორტმა (ბენზინი და დიზელის საწვავი) შეადგინა 842.3  ათასი ტონა, რაც 11 ათასი ტონით აღემატება 2011 წლის ანალოგიური პერიოდის მაჩვენებელს.

მათ შორის, 2012 წელს იმპორტირებულ იქნა 382,4 ათასი ტონა ბენზინი და 459,8  ათასი ტონა დიზელის საწვავი.  2011 წლის მაჩვენებელთან შედარებით ბენზინის იმპორტი შემცირდა 20 ათასი ტონით, ხოლო დიზელის საწვავის იმპორტი გაიზარდა 32 ათასი ტონით.

საწვავის კატეგორიების მიხედვით, 2012 წელს წინა  წელთან შედარებით რეგულარის ტიპის ბენზინის იმპორტი შემცირდა 30 ათასი ტონით, პრემიუმი ტიპის ბენზინის იმპორტი გაიზარდა 10 ათასი ტონით, ხოლო სუპერი ტიპის ბენზინის იმპორტი თითქმის იდენტური იყო. რაც შეეხება დიზელის საწვავის იმპორტს, L-62 ტიპის დიზელის საწვავის იმპორტი გაიზარდა 18 ათასი ტონით, ხოლო ევრო დიზელის - 14 ათასი ტონით.

ქვეყნების მიხედვით ბენზინის საწვავის იმპორტის ყველაზე დიდი მოცულობა განხორციელდა რუმინეთიდან - 145.9 ათასი ტონა, შემდეგ მოდიან: ბულგარეთი - 141.5 ათასი ტონა, აზერბაიჯანი - 60.9 ათასი ტონა, იტალია - 24.6 ათასი ტონა, საბერძნეთი - 9.3 ათასი ტონა და ა.შ.

რაც შეეხება დიზელის საწვავს, იმპორტის ყველაზე დიდი ოდენობა განხორციელდა აზერბაიჯანიდან - 255.5 ათასი ტონა, რუმინეთიდან - 71.8 ათასი ტონა, ბულგარეთიდან - 45.4 ათასი ტონა, იტალიიდან - 4.8 ათასი ტონა.

ბენზინის საწვავის შემცირება პირდაპირ კავშირშია ავტომფლობელთა ავტოგაზის მოხმარებაზე ინტენსიურ გადასვლასთან, რომელიც საკმაოდ სწრაფად და დინამიურად მიმდინარეობს ბოლო 2 წლის განმავლობაში იქიდან გამომდინარე, რომ  ავტოგაზის ღირებულება ბენზინთან შედარებით საკმაოდ სტაბილური და მცირეა (1,10 ლარი/კუბამეტრზე).  აღსანიშნავია ასევე, რომ ავტოგაზის კომპანიები აქტიურად ავითარებენ ქსელს, რათა მომხმარებელს მაქსიმალურად კომფორტული მომსახურება შესთავაზონ. შესაბამისად, ნავთობკომპანიები ცდილობენ მსგავსი ტიპის მომსახურეობა ავტომფლობელებს შესთავაზონ  და აფართოებენ ავტოგაზის ქსელს. ამ მხრივ გასულ წელს აქტიურობდნენ კომპანიები "ვისოლი" და "სოკარი".

დიზელის საწვავის იმპორტის ზრდა დაკავშირებულია სხვადასხვა ფაქტორთან, როგორებიცაა სატრანზიტო გადაზიდვები, ინფრაქსტრუქტურული პროექტები, შიდა მოხმარების ზრდა.  აქვე უნდა აღინიშნოს ბოლო პერიოდში საავტომობილო პარკის ზრდა და წლოვანების მიხედვით განახლება.

იმპორტის მაჩვენებლების მიხედვით შეგვიძლია ვთქვათ, რომ საბიუჯეტო შემოსავალი ნავთობპროდუქტების სექტორიდან გასულ წელთან შედარებით არ იქნება შემცირებული.