ნავთობპროდუქტების იმპორტიორთა კავშირის თავმჯდომარე ვანო მთვრალაშვილის განცხადებით:

ბოლო 1 თვის განმავლობაში საერთაშორისო სასაქონლო ბაზრებზე ნავთობის ფასი ძირითადში იზრდება. კერძოდ, 1 აგვისტოდან 5 სექტემბრამდე ლონდონში InterContinental Exchange Futures Europe-ზე (IСE Futures Europe) - Brent ტიპის ნავთობის ფასი გაზრდილია 7,13 დოლარით/ბარელზე, ხოლო ნიუ-იორკში York Mercantile Exchange-ზე (NYMEX) - Light Sweet ტიპის ნავთობის ფასი - 6,45 დოლარით / ბარელზე.

ნავთობის ფასის ზრდა განპირობებულია შემდეგი მიზეზებით: პირველ რიგში, ეს არის ირანულ ნავთობზე განხორციელებული ემბარგო, რომელიც ძალაში შევიდა 1 ივლისიდან, რის შემდეგაც ირანული ნავთობის იმპორტზე უარი განაცხადა მრავალმა ქვეყანამ, მათ შორის ევრო კავშირის ქვეყნებმა, აშშ-მა, იაპონიამ. მთლიანობაში ირანიდან ნავთობის ექსპორტი თითქმის 40%-ით შემცირდა და ბოლო 20 წლის განმავლობაში ყველაზე დაბალ მაჩვენებელზე დგას. მეორე რიგში, ეს არის მსოფლიო საფინანსო ინსტიტუტების მიერ ეკონომიკის სტიმულირების დაწყება მისი გაჯანსაღების მიზნით. კერძოდ, უახლოეს პერიოდში ევროპის ცენტრალური ბანკი გადაწყვეტს კრიზისში მყოფი ევრო კავშირის ქვეყნების ფინანსურ დახმარებას.

ნავთობის ფასის ზრდის პარალელურად საწვავის ფასები გაზრდილია თითქმის ყველა იმ ქვეყანაში, რომელნიც დამოკიდებულნი არიან ნავთობისა და ნავთობპროდუქტების იმპორტზე.

მაგალითად, აშშ-ში 3 სექტემბრის მდგომარეობით ბენზინის ფასი 4-თვიან მაქსიმუმ მაჩვენებლამდე გაიზარდა, ხოლო დიზელის საწვავის - თითქმის 5-თვიან მაქსიმუმ მაჩვენებლამდე. კერძოდ, ბენზინის ფასმა შეადგინა 3.843 დოლარი/გალონზე - დაახლოებით 1,015 დოლარი/გალონზე (1 გალონი = 3,785 ლიტრი), ხოლო დიზელის საწვავის - 4.127 დოლარი/გალონზე - დაახლოებით 1.090 დოლარი/ლიტრზე. საწვავის ფასები გაზრდილია ასევე ევრო კავშირის თითქმის ყველა ქვეყანაში (იხ. http://oilnews.ge/index.php?menuid=18&lang=1&id=376) და პოსტსაბჭოთა ქვეყნებში (რუსეთი, უკრაინა, სომხეთი, მოლდავეთი და ა.შ).

რაც შეეხება საერთაშორისო ფასებს ნავთობპროდუქტებზე Platt's-ის მიხედვით, რომელზეც დამოკიდებულია საქართველოს საცალო ქსელში არსებული ვითარება, აღნიშნულ პერიოდში ისინიც ძირითადში იზრდება. კერძოდ, აგვისტოს თვიდან 5 სექტემბრის მდგომარეობით საერთაშორისო ფასი ბენზინზე გაზრდილია საშუალოდ 93 დოლარით/ტონაზე (ივლისის თვიდან - 205 დოლარით/ტონაზე), L-62 დიზელის საწვავზე - 76 დოლარით ტონაზე (ივლისის თვიდან - 140 დოლარით/ტონაზე), 10ppm დიზელის საწვავზე - 86 დოლარით ტონაზე (ივლისის თვიდან - 150 დოლარით/ტონაზე).

საერთაშორისო ფასებიდან გამომდინარე საქართველოს საცალო ქსელში აგვისტოს თვეში ფასების კორექტირება დაფიქსირდა 2-ჯერ 5-5 თეთრით/ლიტრაზე ზრდის მიმართულებით.